Тинчлик кун тартибини мустаҳкамлаш: Ўзбекистон Тинчлик кенгаши доирасида конструктив ташаббусларни илгари суришни мақсад қилган
Ўзбекистон Президенти Шавкат Мирзиёев 17–19 февраль кунлари АҚШга ташриф буюриб, мулоқотни ривожлантириш ҳамда долзарб глобал ва минтақавий можароларни тинч йўл билан ҳал этиш учун кўп томонлама платформа сифатида ташкил этилган янги халқаро тузилма – Тинчлик кенгашининг биринчи мажлисида иштирок этади.
2026 йил январь ойида Давосда бўлиб ўтган Жаҳон иқтисодий форумида Тинчлик кенгаши таъсис шартномасини имзолаш маросими бўлиб ўтди. Унда давлатлар, ҳукуматлар раҳбарлари ва бир қатор таъсисчи мамлакатлар вакиллари иштирок этди.
Йил бошида илгари сурилган ушбу ташаббус қатор давлатлар, жумладан, Кенгаш таъсисчилари қаторига кирган Ўзбекистон томонидан қўллаб-қувватланиб, тинч дипломатия, кўп томонлама ҳамкорлик ва халқаро барқарорликни сақлаш учун масъулият тамойилларига содиқлигини тасдиқлади.
Тинчлик кенгашининг ташкил этилиши халқаро ҳамжамиятнинг можароларни олдини олишнинг таъсирчан механизмларини шакллантириш ва ҳозирги замоннинг, энг аввало, Яқин Шарқ минтақасидаги энг ўткир инқирозларнинг сиёсий-дипломатик ечимларини излаш борасидаги саъй-ҳаракатларининг мантиқий давоми бўлди.
Ўзбекистоннинг ушбу тузилмани таъсис этишдаги иштироки Тошкентнинг мулоқот, халқаро ҳуқуқни ҳурмат қилиш ва куч сценарийларига йўл қўймаслик ғояларини илгари суришга қаратилган изчил ташқи сиёсатини акс эттиради. Давлатимизнинг БМТ резолюцияларига мувофиқ адолатли ва барқарор тинчлик ечимини қўллаб-қувватлашга асосланган Фаластин масаласи бўйича позицияси ушбу ташаббус доирасида қўшимча халқаро руҳ олди.
Ўзбекистон давлат раҳбарининг Тинчлик кенгашининг биринчи йиғилишида иштирок этиши сўнгги ойларда кузатилаётган Ўзбекистон – АҚШ сиёсий мулоқотининг фаоллашувига ҳамоҳангдир. Ўтган ярим йил ичида Тошкент ва Вашингтон ўртасидаги олий даражадаги мулоқотлар сезиларли даражада фаоллашди. Бу икки томонлама муносабатларнинг сифат жиҳатидан янги босқичидан далолат беради.
Хусусан, ўтган йил сентябрь ойида Ўзбекистон Президенти БМТ Бош Ассамблеясининг навбатдаги сессиясида иштирок этиш учун Нью-Йорк шаҳрига ташриф буюрди. Унда давлат раҳбарлари ва халқаро ташкилотлар етакчилари билан учрашувлар ўтказилди, глобал ва минтақавий аҳамиятга молик долзарб масалалар муҳокама қилинди.
Мулоқот 2025 йил ноябрь ойи бошида Ўзбекистон Президентининг Қўшма Штатларга амалий ташрифи чоғида янада ривожланди. АҚШ Президенти билан музокаралар, Америка истеблишменти, Конгресси ва ишбилармон доиралари вакиллари билан учрашувлар бўлиб ўтди. Ташриф доирасида стратегик шериклик, иқтисодий ҳамкорлик, инвестициявий шериклик ва минтақавий хавфсизлик масалаларига, шу жумладан, томонлар Марказий Осиёдаги саъй-ҳаракатларни мувофиқлаштиришнинг самарали механизми сифатида кўраётган “C5+1” форматига алоҳида эътибор қаратилди.
Тошкент ва Вашингтон ўртасидаги алоқалар турли форматларда, жумладан, телефон орқали мулоқотлар ва тегишли идоралар ўртасидаги ҳамкорликда қўллаб-қувватланди. Иқтисодий мулоқотнинг кенгайиши ва бизнес ҳамкорлиги учун янги платформаларнинг яратилиши ишонч мустаҳкамланаётганининг қўшимча далили бўлди. Бу амалий ҳамкорликни чуқурлаштиришдан икки томон ҳам манфаатдорлигини акс эттиради. Қўшма Штатларда Ўзбекистонга вазмин ва прагматик ташқи сиёсат олиб бораётган ишончли, олдиндан айтиш мумкин бўлган ва масъулиятли ҳамкор сифатида қараш тобора барқарор тус олмоқда.
Шу нуқтаи назардан, Ўзбекистоннинг Жаҳон кенгашидаги иштироки мамлакатнинг халқаро нуфузи ортиб бораётгани ва унинг глобал жараёнлардаги конструктив роли эътироф этилаётгани ифодаси сифатида баҳоланмоқда. Вашингтон учун бу, Тошкент Евроосиё ва ундан ташқарида тинчлик, хавфсизлик ва барқарор тараққиётни мустаҳкамлашга қаратилган ташаббусларни илгари суришда муҳим ҳамкор эканининг тасдиғи бўлиб хизмат қилади.
Сиёсий мулоқот фаоллашгани фонида Ўзбекистон–АҚШ ҳамкорлиги муҳим йўналишларда кенгайиб бормоқда. Гап минтақавий хавфсизлик соҳасидаги ҳамкорлик, Ўзбекистондаги иқтисодий ислоҳотларни қўллаб-қувватлаш, савдо ва инвестицияларни ривожлантириш, гуманитар ва таълим алоқаларини чуқурлаштириш ҳақида бормоқда. Энергетика, рақамлаштириш, инфратузилма ва кадрлар тайёрлаш борасидаги қўшма лойиҳалар узоқ муддатли шериклик учун мустаҳкам замин яратмоқда.
Шундай қилиб, Ўзбекистон Президентининг Тинчлик кенгашининг бўлажак биринчи йиғилишида иштирок этиши нафақат мамлакатнинг халқаро мулоқотнинг янги архитектурасини шакллантиришдаги фаол ролини таъкидлайди, балки Ўзбекистон–АҚШ муносабатларининг ижобий динамикасини тўлдиради. АҚШга ушбу ташриф, шубҳасиз, Тошкент ва Вашингтон ўртасидаги ўзаро ҳамкорликни ҳар икки томон манфаатларига, минтақада ва умуман дунёда тинчлик ва барқарорликни мустаҳкамлаш вазифаларига жавоб берадиган барқарор стратегик даражага олиб чиқишга хизмат қилади.
“Дунё” АА